ROXAS CITY, CAPIZ- Ginkumpirmar sang talatapan sang Provincial Disaster Risk Reduction and Management Office Capiz nga padayon ang ila nga konsultasyon para sa pagpapasar sang Magna Carta sang Disaster Risk Reduction and Management workers sa probinsya.
Sa interview sang Bombo Radyo kay Atty. Shiela Artillero, Head sang Provincial Disaster Risk Reduction and Management Office Capiz, iya ginpahayag nga ginalauman sang ila nga opisina ang suporta sang Local Disaster Risk Reduction and Management Office sang Catanduanes para sa mas malapad nga paghulag sang Public Disaster Risk Reduction and Management workers kag pila ka mga nagakaigo nga benepisyo para sa ila.
Ginalauman nga makabenepisyo ang mga local responders sang probinsya sang Capiz sa tion nga mapasar ang Magna Carta for Disaster Risk Reduction and Management workers.
Nahibaluan nga ang ini nga hagna ang magahatag sang insurance, security of tenure, kag iban pa nga mga benepisyo sa mga nagaatubang sang peligro sa kada operasyon. Isa sa mga rason kun ngaa ginaduso ang Magna Carta amo ang kakulangan sang legal base para sa mga Disaster Risk Reduction and Management workers.
Pahayag pa ni Artillero, wala pa sa karon sang kasubong nga hagna para sa mga responders sang Provincial Disaster Risk Reduction and Management Office, rason nga ginatinguhaan nga mahatagan sila sang kasubong nga proteksyon kapareho sang iban pa nga yara sa sector sang emergency response.
Ginakabig ini nga isa ka tikang nga luyag magtukod sang mas lig-on nga sistema para sa mga frontliner sa disaster response. May posibilidad nga mangin modelo ang Capiz sa pagkilala kag pagproteher sang mga Disaster Risk Reduction and Management workers sa pilipinas.
Sa bulig sang Local Disaster Risk Reduction and Management Office sang Catanduanes, luyag sang Provincial Disaster Risk Reduction and Management Office nga maestablisar ang klaro nga basehan sa mga benepisyo para sa mga local responders.
With a report from Bombo Jessa Mae De Los Santos
