ROXAS CITY – Ilabi pa nga ginpahugot ang quarantine procedures kag border control sa probinsiya sang Capiz bangud sa padayon nga pagsaka sang kaso sang coronavirus disease (COVID-19) sa pungsod.
Ini ang pinaagi sa ginpapanaog nga Executive Order No. 011 series of 2020 ni Capiz Governor Esteban Evan Contreras.
Nasaad diri ang pagpatuman sang travel restriction sumugod Marso 15 magluwas na lamang sa mga government officials, medical personnels ukon health workers, mga pasyente nga may chemotherapy ukon hemodialysis kag residente sang probinsiya.
Pasangkaron man ang regulasyon sa mga nagasulod nga common carriers sa probinsiya kag pagpatuman sang mas estrikto nga border control.
Ginpaidalom naman sa general community quarantine ang bilog nga probinsiya kun sa diin kinahanglan nga magsunod ang mga local government units (LGU’s) sa mga direktiba sang Department of Health kag Department of Interior and Local Government.
Ginaduso man ang flexible work arrangement sa pampubliko kag pribado nga sektor bangud sang pamahog sang nasambit nga balatian.
Nagapabilin naman nga suspendido ang klase sa tanan nga lebel sa pampubliko kag pribado nga eskwelahan sa probinsiya.
Sa pihak nga bahin, nagpaguha naman sang executive order si Roxas City Mayor Ronnie Dadivas para sa mas hugot nga border security kag quarantine protocols sa siyudad sang Roxas.
