CAPIZ – Ginapanan-aw ni Capiz Governor Fredenil Castro nga posible indi madayon ang Barangay kag Sangguniang Kabataan Elections (BSKE) sa Nobyembre 2026.
Sandig sa calendar of activities sang Commission on Elections (COMELEC), natalana sa Nobyembre 2, 2026 ang eleksyon.
Suno kay Governor Castro, balantayan ang State of the Nation Address (SONA) ni President Ferdinand Marcos Jr. sa Hulyo 27 sa Lunes nga adlaw.
Balantayan man ang pag-umpisa sang session sang Kamara kag Senado bangud posible nga may yara sang dugang nga mag-file sang resolution nga ipaiway anay ang eleksyon.
Apang pahayag sang gobernador, may eleksyon man ukon wala, nagakadapat nga may yara sang karakter kag integridad ang tagsa ka mga opisyal sang barangay.
Nahibaluan nga may yara sang House Resolution No. 00936 nga nagapanawagan sa COMELEC nga i-postpone ang November 2026 elections.
Magluwas sa Kamara, may yara man sang gin-file nga Senate Bill No. 2067 si Senator Imee Marcos nga nagahingyo nga isulon ang eleksyon sa una nga Lunes sang Oktubre 2027 kag indi sa Nobyembre 2026.
Sa pihak sang mga na-file nga hagna, ginkumpirma sang COMELEC nga wala sang bag-o nga layi nga napirmahan, buot silingon padayon ang preparasyon sang ahensya sa idalom sang manual voting nga natalana sa Nobyembre 2.
