ROXAS CITY – Ginkompirmar ni Capiz Governor Esteban Evan ‘Nonoy’ Contreras nga kulang ang mga medical health workers nga nagatrabaho sa probinsya subong nga Coronavirus Disease ukon COVID-19 Pandemic.
Sa interview sang Bombo Radyo kay Contreras nga nagahulat na lamang ini sa Department of Health para sa dugang nga iga-deploy nga mga doktor kag nurses sa mga ospital partikular na sa Roxas Memorial Provincial Hospital ukon RMPH.
Ginpahayag sang gobernador nga ginatinguhaan pa sini nga masolusyonan ang amo nga problema agud indi na maapektuhan ang operasyon sang mga ospital.
Dugang pa sini nga may yara ini kasugtanan sa pagkuha sang mga doktor kag nurses gikan sa mga disrtrict hospitals.
Aminado si Contreras nga mabudlay man para sa mga medical workers ang trabaho apang ginpanindugan sini nga indi lamang tungod sa atrasado nga sweldo ang rason sang pag resign sang mga ini.
Suno sa gobernador nga may yara sang nagkalain-lain man nga rason ang mga nurses kag doktor sa pagbiya sa ila nga obligasyon bangud gina-amligan lamang nila ang ila ikaayong lawas kag pamilya batuk sa makamamatay nga virus.
Bangud diri, suno sa gobernador padayon ang screening sang mga nurses nga amo ang iga-assign sa Roxas Memorial Provincial Hospital kag KABALAKA Provincial Isolation Facility sa Capiz Villareal Stadium.
Pag-abot naman sa bed capacity sa mga ospital kag sitwasyon sa magkatuhay nga mga quarantine facility ginpahayag sini nga bastante pa kag gilayon man sini nga ginamonitor ang status sang mga sa mga kabanwahanan.
Sa isyu naman pag-abot sa sweldo sang mga ini ginklaro sang gobernador nga ind pareho ang local kag national bangud indi man direkta ang pagsulod sang pondo.
Samtang, gintadlong naman ni Contreras ang isyu natuhoy sa mga ginasweldo sang mga municipal kag barangay coordinators sa probinsya.
Ginpahayag sang gobernador nga wala man sang ghost employee nga nagatrabaho sa gobyerno probinsyal.
Gin-athag ni Contreras nga kinahanglan ang trabaho sang mga coordinators agud nga nakahibalo siya sa tanan nga mga kinahanglanon sang mga kabanwahanan.
