ROXAS CITY – Bukas si Capiz Governor Esteban Evan ‘Nonoy’ Contreras nga i-konsiderar nga makasulod sa Capiz ang mga residente sang probinsiya gikan sa kaiping nga mga ka-probinsiyahanan.
Ini ang ginpahayag sang gobernador sang mainterview sang Bombo Radyo.
Kasunod ini sang pagdagsa pa sang mga residente nga magapauli sa Capiz gikan sa kaiping nga mga probinsiya sa pihak sang hugot nga pagdumili sa pagpasulod sa ila sandig sa Memorandum Order No. 11, series of 2020 nga ginpapanaog sang gobernador.
Suno sa gobernador nga nakahanda ini nga ligwaton ang pila ka mga pagsulundan sa idalom sang implementing guidelines sang nasambit nga EO agud makonsiderar kag mapasulod ang mga residente sang probinsiya.
Ginpahayag ni Contreras nga ini ang bilang pagpakita na lamang sang humanitarian consideration sa mga pumuluyo sang Capiz.
Apang posible suno sa gobernador nga pangayuan sila sang promisory letter nga sila ang magapaidalom sa home-quarantine.// Bangud diri, gilayon nga magapakig-angut ang gobernador sa iya legal department sang gobyerno-probinsiyal nga magpakig-angut sa mga natungdan nga ahensiya para sa amo nga plano.
