ROXAS CITY – Indi luyag ni Capiz governor Esteban Evan ‘Nonoy’ Contreras nga mangin isa ka negosyo ang pondo para sa Annual Investment Program (AIP) sang iya administrasyon.
Ginpahayag ni Contreras nga ang pondo sang gobyerno-probinsiya ang indi kasubong sang isa ka negosyo nga kinahanglan may yara sang savings nga mabilin.
Suno diri, nga kun gina-implementar sang husto ang mga nanari-sari nga programa kag proyekto, dapat nga maubos ang pondo para diri.
Ginpahayag ni Contreras nga kun wala man sang savings nga mabilin kada tuig, pamatuod lamang ini nga gingasto ini kag ginpatuman sang husto.
Posible suno kay Contreras nga rason kun ngaman sa nakaligad nga tatlo ka tuig wala madala ang probinsiya sang Capiz sa nakabaton sang Seal of Good Local Governance sang Department of Interior and Local Government (DILG) bangud sa kada tuig, may mga bilin ini nga pondo.
Mahibaluan nga masobra 20 bilyones pesos ang gin-aprubahan nga (AIP) para sa tuig 2020 sa ginpatigayon nga Provincial Development Council Meeting sang gobyerno-probinsiyal.
Sa amo nga pondo, 18.1 bilyones pesos diri ang pagakuhaon sa external sources ukon gikan sa mga national agencies kag ang 1.8 bilyones pesos naman ang gikan sa local sources.
