ROXAS CITY – Aminado si Capiz Governor Esteban Evan Contreras nga may mga indibidwal nga nagapangayo sang bulig sa posibilidad nga makapatigayon sang operasyon sang Small Town Lottery (STL) sa probinsya.
Suno kay Contreras nga sang tinalikdan nga duha ka semena may yara sang duha ka mga grupo nga luyag magpakighinun-anon sa iya natuhoy sa operation sang STL apang iya ginbalibaran bangud sa nakuha sini nga impormasyon nga wala sang authorized licensed nga ginhatag ang Philippine Charity Sweepstakes Office (PCSO) sa probinsya sang Capiz.
Bangud diri, gilayon nga nagpakig-angut si Contreras sa Provincial Director sang Capiz Police Provincial Office agud tsekyaron kun may yara sang nagapatigayon sang illegal numbers game sa probinsya ukon bookies.
Gilayon nga ginpasalig ni Police Colonel Canilo Fuentes, Provincial Director sang CPPO nga pagabantayan ang posibilidad nga pagpatigayon sang illegal numbers game sa probinsya.
Nagapati si Contreras nga posible nga ginagamit ang pangalan sang Provincial Director sang probinsya kag Regional Director sang hanay sang pulisya para makapatigayon sang ilegal nga aktibida.
Apang sa tion nga mapamatud-an ni Contreras nga may yara sang illegal nga operasyon sang STL sa probinsya gilayon niya ini nga ipalab-ot sa national headquarters sang PNP agud gilayon nga masolusyunan.
