ROXAS CITY – Magapapanaog sang memorandum order si Capiz Governor Esteban Evan Contreras sa mga Local Government Units (LGU’s) sa mga kabanwahanan nga nagahatag sang diskresyon sa mga ini sa pag-kanselar sang klase para sa seguridad sang mga kabataan kadungan sang bagyo nga Tisoy.
Suno kay Contreras nga ginatugyan sini sa mga LGU’s ang pagmonitor sa ila tagsa ka mga areas of responsibility kun nagakadapat nga magdeklara sang kanselasyon sang klase.
Ginpasalig ni Contreras nga sa tion nga mag-landfall ang Bagyong Tisoy, siya na mismo ang magadeklarar sang total suspension sa bilog nga Capiz.
Ginalikawan ni Contreras nga basta-basta na lamang magsuspendi sang klase bangud sa posibilidad nga maapektuhan naman ang calendar days sang Department of Education (DepEd) bangud sang bagyo.
Samtang, ginapreparar naman sang Department of Social Welfare and Development (DSWD) kag Provincial Social Welfare and Development Office (PSWDO) ang pagpamutos sang mga relief goods sa mga maapektuhan sang bagyo.
Ginpasalig man sang gobernador nga preparado naman ang tanan nga mga evacuation centers sa mga kabanwahan kag ang mga heavy equipments nga pagagamiton sa pag-evacuate sang mga indibidwal nga maapektuhan sang Bagyo Tisoy.
Nagapanawagan si Contreras sa mga residente nga mag-aligmat sa tanan nga oras kag mangin updated sa lakat sang panahon.
