ROXAS CITY – Ginbasa ni League of the Municipalities in the Philippines (LMP) Capiz Chapter President kag Mambusao Mayor Leodegario ‘Jun’ Labao Jr. ang resolusyon nga gin-aprubahan sang ila asosasyon nga naga-request sang pondo ang mga kabanwahanan sa ginpatigayon nga Provincial Development Council Meeting sang gobyerno-probinsiyal.
Suno kay Labao nga nagahinyo sila sang tag-10 milyones pesos para sa banwa sang Sapian kag Panay; kag tag 5 milyones pesos naman para sa tanan nga mga kabanwahanan magluwas lamang sa Mambusao.
Ginpahayag ni Labao nga ang ila nga asosasyon ang naga-request sa gobernador kag wala nagapamilit ukon nagapwersa.
Suno kay Labao nga ang ini nga pondo ang gamiton sang mga local chief executives sa ila tagsa ka mga programa sa ila nasakupan nga banwa.
Sa ulihi nagpahayag pa si Labao nga kun gilayon nga magapa-‘huo’ kag paboran ni Capiz governor Esteban Evan ‘Nonoy’ Contreras ang ila request, handa siya nga magluhod sa atubang sang gobernador.
Malipayon naman nga ginpahayag sang gobernador kay Labao nga indi lamang sang 5 milyones pesos ang ginpain sang gobyerno-probinsiyal para sa mga kabanwahanan nga pagakuhaon sa 20 porsyento sa Development Fund.
Suno kay Contreras nga para sa Roxas City may ginpain ini nga 17.3 milyones pesos; 24.7 milyones pesos sa Panay; 28.4 milyones pesos sa Panit-an; 17 milyones pesos sa Pontevedra; 21.5 milyones pesos sa President Roxas; 15 milyones pesos sa Maayon; 22 milyones pesos sa Pilar; 17 milyones pesos sa Tapaz; 8 milyones pesos sa Jamindan; 5.5 milyones pesos sa Dumalag; 11 milyones pesos sa Sapian; 13.5 milyones pesos sa Cuartero; 13 milyones pesos sa Dao; 7.5 milyones pesos sa Mambusao; 21 milyones pesos sa Dumarao; 10.9 milyones pesos sa Sigma, 14.5 milyones pesos sa Ivisan nga kun sumahon, kabug-usan nga kapin 122 milyones pesos.
