ROXAS CITY-Ginpanindugan sang provincial goverment pinaagi sa Public Information Officer nga may yara sang kinamatarong si Capiz Governor Esteban Evan Nonoy Contreras nga magpapanaug sang show cause order batuk kay Roxas City Mayor Ronnie Dadivas.
Sa interview sang Bombo Radyo kay Atty. Atlas Catalan ginpahayag sini nga nabaton na sang gobernador ang sabat ni Davidas natuhoy sa ginpapanaog nga show cause order.
Apang suno kay Catalan nga pagatun-an pa sang legal office ang nangin sabat ni Dadivas natuhoy sa pagpamalabag sini sang kapin 53 ka mga Locally Stranded Individuals ukon LSI’s nga magapauli kuntani sa probinsya gikan sa Batangas Port.
Dugang pa ni Catalan nga sa tion nga indi kumbinsido ang sabat ni Dadivas gilayon nga magapasaka ang gobernador sang kaso nga administratibo batuk sa nasambit nga alkalde.
Ginpanindugan ni Catalan nga may yara sang kinamatarong ang gobernador nga mag papanaog sang show cause order batuk kay Dadivas.
Gintumod man ni Catalan ang Section 465 sang Local Government Code of the Philippines nga nangin basehan sang gobernador nga magpapanaog sang show cause order.
Matandaan, nga ginsabat ni Roxas City Mayor Ronnie Dadivas ang show cause order ni Contreras kun sa diin gintumod man sini nga sandig sa Local Government Code of the Philippines ang presidente gid lamang pinaagi sa Department of the interior and Local Government ang may yara sang poder nga magpapanaog sang show cause order sang mga local officials sa pungsod.
