ROXAS CITY – Nagpasalig si Capiz Governor Esteban Evan “Nonoy” Contreras nga pagaimbestigahan sang maayo sang gindesignar sini nga fact finding committee ang ginaalegar kapabayaan sang Bailan District Hospital sa napatay nga mag-iloy nga residente sang Pres. Roxas, Capiz.
Ini ang ginkompirmar ni Contreras sang mainterview sang Bombo Radyo.
Suno kay Contreras nga ginahibalo gid sang maayo sang fact finding committee nga ginalakipan nanday Dr. Ramon T. Nolasco sang Hospital Management Section; Board Member Esteban Jose B. Contreras, Chairman sang Committee on Health; Atty. Esteban Angeles B. Contreras, Provincial Legal Officer; Mr. Francisco D. Dariagan sang Provincial Government Department Head sang Human Resource Management Office kag Dr. Samuel C. Delfin, Provincial Health Officer kun sin-o ang may yara sang kasaypanan sa natabo sa mag-iloy.
Ginpahayag sini nga makapila ka beses naman ini nakabati sang mga reklamo sa amo nga ospital pag-abot sa pagtatap sang amo nga ospital sa mga pasyente.
Kalakip na diri, ang pag refer sa iban nga mga ospital kag indi pagbaton sa mga pasyente nga wala sang bayad.
Gani, nagaplano si Contreras nga magdihon sang nagakaigo nga mga kinahanglanon sa mga ospital sa prpbinsya.
Samtang, may yara naman sang nagakaigo nga salabton ang mga ospital nga wala nagabaton sang ila mga pasyente apisar nga nabudlayan na ang mga ini.
Nagalaom naman si Contreras nga indi na matabo sa iban ang natabo sa mag-iloy.
Samtang, ginpasalig naman sini nga pagahatagan sang atensyon sang provincial government ang mga ospital sa probinsya partikular na sa mga pampubliko nga ospital.
