ROXAS CITY – Wala nagalaom ang gobernador sang probinsiya nga indi magtuman sa iya ginpapanaog nga cease and desist order ang operator sang illegal quarry operation sa Barangay Parian, Sigma, Capiz nga si Ramonito Laab.
Ini ang ginpahayag ni Capiz governor Esteban Evan ‘Nonoy’ Contreras sang mainterview sang Bombo Radyo.
Ini ang kasunod sang reklamo sang mga pumuluyo sa nasambit nga lugar bangud sa padayon nga operasyon sang illegal quarry sa pihak sang mandatu nga temporaryo nga pagpauntat diri bangud sang pila ka mga bayolasyon.
Suno kay Contreras, kasunod sang pagpakighinala sa iya sang pila ka mga residente, gilayon ini nga nagpakig-angut sa talatapan sang Capiz Environment and Natural Resources Office (CaPENRO).
Diri kag nagpatigayon sang inspeksiyon ang CaPENRO sa nasambit nga lugar kag natukiban nga may pila ini ka mga bayolasyon.
Bangud diri, sadtong Oktubre 30, 2019, nagpapanaog sang cease and desist order ang gobyerno nga nagapauntat sa illegal quarry operation sa lugar.
Suno pa kay Contreras nga sang iya gin-usisa ang talatapan sang CaPENRO, iya natukiban nga wala man makatambong ang kampo ni Laab sa gintalana nga adlaw sang CaPENRO para kuntani depensahan ang ila nga bahin.
Samtang suno pa sa gobernador, bukas ang iya talatapan para sa mga tagreklamo nga luyag magpalab-ot sang impormasyon natuhoy sa ilegal nga operasyon sa ila lugar.
