ROXAS CITY – Indi pa makapasalig si Capiz Governor Esteban Evan ‘Nonoy’ Contreras nga mahatagan sini sang katumanan ang ginahinyo nga dugang nga pondo sang mga alkalde sa kabanwahanan para sa ila nga kampanya kontra sa coronavirus disease (COVID-19).
Ini ang ginpahayag sang gobernador sang mainterview sang Bombo Radyo.
Mahibaluan nga ginpalab-ot sang League of the Municipalities of the Philippines (LMP) Capiz Chapter ang ila nga hinyo sang ginpatawag ang mga ini sang gobernador sa isa ka sinapol.
Wala nagpamalibad ang gobernador apang wala man ini nagpasalig nga mahatag ang ginahinyo sang mga alkalde.
Suno diri nga madamo pa sang ginagastusan ang gobyerno-probinsiyal ilabi na sa mga COVID-19 patients kag sa padayon nga pagpapauli sang mga Locally-Stranded Individuals (LSI’s) kag Returning Overseas Filipinos (ROF’s).
Ginalauman man sini nga dako pa ang pagagastuhon sang gobyerno-probinsiyal sa plano nga pagpatukod sang Provincial Quarantine Facility.
Mahimo man suno diri nga gamiton sang mga local chief executives sa mga kabanwahanan ang pondo sa ila tagsa ka mga banwa para sa ila mga lihok kontra COVID-19.
Nagapati si Contreras nga sa ginapangatubang sa karon nga pandemiya, importante nga nagabuligay ang tanan.
Samtang, natalana nga magpaguwa sang isa ka Executive Order (EO) ang gobernador natuhoy sa nagakadapat nga himuon sang mga LGU’s sa nagapalauli nga mga ROF’s kag LSI’s.
Sa amo nga EO suno diri, mahimo nga makadesisyon kag isa ka LSI ukon ROF nga mag-akupar ukon maghimo sang iya kaugalingon nga private quarantine facility.
