ROXAS CITY – Nangin sentro sang diskurso-pribiliheyo ni Board Member Mateo Hachuela sa sesyon sang Sangguniang Panlalawigan si Capiz Governor Esteban Contreras nga amo suno sa iya ang naga-upang sa provincial board sa ila trabaho bilang legislative body sang gobyerno-probinsiyal.
Ang mensahe ni Hachuela ang natuhoy sa makaduha ka beses nga wala pagtambong sang mga department heads kag medical staffs sang Roxas Memorial Provincial Hospital sa imbitasyon sang konseho sa ila sesyon bangud sa mismo pagpugong diri sang gobernador.
Suno kay Hachuela, ini ang nagapakita sang indi pag-respeto sang gobernador sa mga miyembro sang mga mamalidha nga gin-elihir kag ginsaligan man sang tawo kapareho sa iya.
Panindugan ni Hachuela, indi sila makatrabaho sang husto bangud mismo ang gobernador ang nagaupang sa ila agud himuon ang ila nga trabaho.
Bangud diri, luyag ni Hachuela nga pasakaan sang reklamo ang gobernador indi lamang sa Office of the Ombudsman, kundi mangin sa Office of the President kag Department of Interior and Local Government.
May pila naman ka miyembro sang provincial board ang nagpahayag nga hatagan sang ‘last chance’ ukon katapusan nga kahigayunan ang gobernador nga patambungon ang gina-imbitar nga mga indibidwal sang provincial board kag kun indi sa gihapon ini mahimo, diri na kag magadihon sang legal nga aksiyon ang legislative department batuk sa gobernador.
Matandaan nga kalakip sa gin-imbitar sang provincial board sa ila sesyon amo ang Provincial Adminstrator, Provincial Engineer, Provincial Budget Officer, Provincial Health Officer, Chiefs of Hospitals kag pila ka katapo sang RMPH apang makaduha ka beses nga ‘no show’ ang mga ini.
Magasentro kuntani ang ginpatawag nga sesyon sa pagtalakay sang pondo ukon budget-deliberation sang gobyerno-probinsiyal partikular na ang pagpain sang pondo para sa mga ospital sa probinsiya.
