ROXAS CITY – Nagpapanaug sang Memorandum Order 145 Series of 2020 sadtong Oktubre 30 si Capiz Governor Esteban Evan Nonoy Contreras agud nga paimbestigahan ang ginaalegar kapabayaan sang Bailan District Hospital sa mag-iloy nga nadulaan sang kabuhi.
Kalakip sa ginmanduan ni Contreras nga magapatigayon sang imbestigasyon amo sanday Dr. Ramon T. Nolasco sang Hospital Management Section; Board Member Esteban Jose B. Contreras, Chairman sang Committee on Health; Atty. Esteban Angeles B. Contreras, Provincial Legal Officer; Mr. Francisco D. Dariagan, PGDH-HRMO kag Dr. Samuel C. Delfin, Provincial Health Officer.
Ini matapos nga ginkasubo sang gobernador ang natabo sa ginang kag isa ka lapsag matapos nga ginaalegar ginpabay-an kag wala ginhatagan sang pagtamud ang ginang sa amo nga ospital.
Sa interview sang Bombo Radyo kay Atty. Esteban Angeles nga nagpakig-angut na sila kay Dr. Venus Loretizo Chief of Hospital sang Bailan District Hospital nga maga-conduct sila sang imbestigasyon.
Magluwas diri, nga ginapasumiter ang amo nga ospital sang report natuhoy sa natabo sa mag-iloy nga Baylen.
Dugang pa sini nga hibaluon man nila tanan ang history kag nangin sitwasyon sang mag-iloy sa Bailan District Hospital kag Capiz Doctor’s Hospital subongman ang OB-Gyn sang ginang nga si Dra. Marrietta Hao antes pa man nadala sa ospital.
Mahibaluan nga magluwas sa natabo sa mag-iloy madamo na sang mga reklamo nga nabaton ang ospital sa mga pumuluyo angut sa pagbulong sa mga pasyente.
Samtang, sa tion nga mapamatud-an nga may yara sang kakulangan ang amo nga ospital sa mag-iloy ginpasiguro naman sang gobernador nga pasabton ang amo nga ospital kag hatagan sang nagakaigo nga sanctions.
Matandaan nga gindala ang ginang nga si Mary Cris Baylen 30-anyos sang Barangay Cubay, Pres. Roxas, Capiz sang gab-i sadtong Oktubre 24 matapos nga nagsakit ang tiyan sini.
Apang, ginaalegar nga wala ginhatagan sang maayo sang amo nga ospital rason sang Oktubre 25 gindala ang ginang sa Capiz Doctor’s Hospital kun sa diin sa pagbun-ag sini patay na ang lapsag kag gilayon man ginbawian sang kabuhi si Mary Cris.
