ROXAS CITY – Hugot nga ginapatuman ang border restriction sa mga tawo nga nagikan sa siyudad sang Iloilo nga magapadulong sa siyudad sang Roxas kag probinsya sang Capiz.
Ini base sa ginpost sang Capiz Provincial Government sa pagpanguna ni Governor Esteban Evan Nonoy Contreras sa iya nga facebook page sining Agosto 16, 2020 matapos nga ginpaidalom sa General Community Quarantine ukon GCQ ang siyudad sang Iloilo.
Otomatiko ini nga mangin epektibo bangud sa pamahog nga dala sang Coronavirus Disease ukon COVID-19 diri sa probinsya.
Bangud diri, makabig na nga Locally Stranded Individuals ukon LSI’s kag ipaidalom sa 14 day facility quarantine ang sin-o man nga mga indibidwal nga magahalin sa siyudad sang Iloilo kag magapadulong sa probinsya sang Capiz.
Kinahanglan nga magprisentar sang mga nagakaigo nga mga rekisitos kapareho sang Valid ID, Thermal Scanning ukon ginatsekyar ang temperatura sang mga tawo pinaagi sa thermal scanner., Medical Clearance/Certificate para sa mga Authorized Personnel Outside Residence kag indibidwal nga (Valid for 72 hours); Letter of Acceptance kag Travel Authority (For Iloilo City only).
Pag-abot naman sa mga public transport vehicles nga magasulod sa probinsya, kinahanglan nila magsumiter sang ‘passenger manifest’ sa border checkpoints, Vehicle Identification, lugar kun sa diin ini naghalin nga destinasyon, Date and time of departure from origin kag pila ka mga nagakaigo nga impormasyon.
Samtang, hugot man ang ginapatigayon nga checkpoint sang mga kapulisan kaupod ang PDRRMO sa mga pasahero nga nagapadulong diri sa probinsya.
