ROXAS CITY – Nakahanda nga maghatag si Capiz governor Esteban Evan Contreras sang private lawyer para sa masobra 200 ka mga biktima sang illegal recruitment nga ginpasalig sang trabaho sa South Korea.
Ini ang ginpahayag sang gobernador sang mainterview sang Bombo Radyo kasunod sang pagtuhaw sang mga biktima sa Roxas City Police Station.
Suno kay Contreras nga ginpatawag sini ang mga biktima agud hinalaan ang iya mahatag nga bulig agud mabalik ang ginhatag sang mga ini nga tag-P73, 700 bilang bayad sa nag-recruit nga si Ramilyn Andrade kag live-in partner sini nga Korean national nga si Kim Taehyeong.
Mismo ang provincial government ang magahatag sang private lawyer agud mapasakaan sang nagakaigo nga panumbungon si Andrade kag mapasabat ini sa ginhimo nga pagpanunto sa masobra 200 ka mga biktima.
Suno kay Contreras nga dapat mahatagan sang leksiyon ang illegal recruiter nga nagpasalig sang trabaho bilang factory worker sa South Korea sa mga biktima.
