CAPIZ-Gin-lift ni Capiz Governor Fredenil H. Castro paagi sa Executive Order No. 30, Series of 2026, ang pagdumili sa pagsulod sa probinsya sang mga buhi nga baboy, karne sang baboy kag mga produkto sini halin sa Negros Island, Iloilo Province kag iban pa nga mga lugar.
Sa amo nga tikang, gin-untat na ang una nga pagdili sa pagsulod sang amo nga mga produkto sa Capiz. Apang, kinahanglan gihapon nga sundon ang mga regulasyon nga ginapatuman sang probinsya may kaangtanan sa transportasyon sang mga baboy kag pork products.
Magapadayon man ang operasyon sang mga quarantine checkpoint agud mamonitor ang pagbiyahe kag pagsulod sang mga baboy kag mga produkto sini. Kabahin ini sang mga tikang agud mapadayon ang pagpanalipod sa industriya sang paghuyang sang baboy kag malikawan ang posible nga paglapta sang mga balatian sang kasapatan.
Ginaagda ang tanan nga hog raiser, negosyante kag iban pa nga stakeholders nga magkooperar sa mga nagakaigo nga ahensya kag magsunod sa ginapatuman nga biosecurity protocol. Importante ang ila kooperasyon agud masiguro nga ang pagbiyahe sang mga baboy kag pork products nagasunod sa mga kinahanglanon nga regulasyon.
Sa pihak sang pag-alsa sang pagdili, ginapahanumdom gihapon ang tanan nga magpabilin nga mabinantayon kag responsable sa pagdala sang mga baboy kag mga produkto sini. Ang padayon nga pagmonitor kag pagsunod sa mga regulasyon importante agud maprotektaran ang kahimsog sang mga kasapatan kag ang industriya sang baboy sa probinsya sang Capiz.
