CAPIZ-Ginpangunahan ni Governor Fredenil H. Castro ang pormal nga pagbendisyon sang apat ka bag-o nga salakyan sang banwa sang Dumarao, lakip ang firetruck, ambulansya, truck sang Department of Agriculture (DA) kag garbage compactor, subong nga adlaw, Nobyembre 12, 2026.
Ang bag-o nga firetruck naghalin sa Department of the Interior and Local Government (DILG), nga ang Dumarao amo ang isa sa mga banwa sa bug-os nga Pilipinas nga nahatagan sang kahigayunan nga makabaton sini.
Nahimo nga posible ang pag-angkon sang apat ka salakyan paagi sa pag-endorso kag pagpanikasog nanday Governor Castro kag 2nd District Congresswoman Inday Baby Jane T. Castro agud masuportahan ang kinahanglanon nga kagamitan sang mga kabanwahanan sa probinsya.
Paagi sa mga bag-o nga salakyan, ginapaabot nga mapabakod ang kapasidad sang Dumarao sa pagresponde sa sunog kag iban pa nga emerhensya, paghatag sang medikal nga bulig, pagsuporta sa sektor sang agrikultura kag pagpauswag sang sistema sang pagkolekta kag pagdumala sang basura.
Ginpangunahan ni Rev. Fr. Vicente T. Diangco sang Our Lady of the Snows Parish ang pagbendisyon sa mga salakyan, nga gintambungan nanday Dumarao Mayor Mateo C. Hachuela, Vice Mayor Gleah Rose B. Hachuela, BFP Regional Director FCSUPT Edwin P. Vargas, mga lokal nga opisyal, mga hepe sang nagkalain-lain nga departamento kag iban pa nga representante sang lokal nga panguluhan.
