ROXAS CITY – Ginhatagan ni Capiz Governor Esteban Evan ‘Nonoy’ Contreras sang tubtob alas otso sang gab-i subong nga adlaw (Marso 18) ang mga Capizeño nga makasulod kag makapauli sa probinsiya sang Capiz.
Kasunod ini sang pagdagsa pa sang mga residente nga magapauli sa Capiz gikan sa kaiping nga mga probinsiya kapareho sang Aklan kag Iloilo sa pihak sang hugot nga pagdumili sa pagpasulod sa ila sandig sa implementing guidelines sang Memorandum Order No. 11, series of 2020 nga ginpapanaog sang gobernador bangud sang pamahog sang coronavirus disease (COVID-19).
Ginpahayag ni Contreras nga ini ang bilang pagpakita na lamang sang humanitarian consideration sa mga pumuluyo sang Capiz.
Nag-apelar man ang gobernador sa iga-konsiderar nga mga indibidwal nga sa ila pagpauli, magpaidalom sila sa self-quarantine.
Ginpahayag sang gobernador nga magaagi sa gihapon sa nagakaigo nga proseso ang nasambit nga mga indibidwal antes sila dalayon nga pasudlon.
Kalakip na diri ang pila ka mga pagpangusisa, pagpaidalom sa ila sa thermal gun scanning, kag pagpresentar sang health declaration.
