ROXAS CITY-Nagpositibo sa Coronavirus Disease ukon COVID-19 si Capiz Governor Esteban Evan Nonoy Contreras.
Ini ang ginkumpirmar mismo ni Gov. Contreras sang mainterview sang Bombo Radyo.
Suno kay Contreras nga ginakasubo gid sini ang pagpositibo sa COVID-19 matapos nga nagpaidalom ini sa Real-Time Polymerase Chain Reaction ukon RT-PCR test kasunod sang pagpositibo sang duha sini ka mga empleyado sa Governor’s Office.
Ginpahayag sang gobernador nga asymptomatic ini ukon wala sang may nabatyagan nga sintomas sang amo nga balatian rason nga nagapaidalom na ini sa 14 day strict home quarantine.
Sa pihak sini, magapadayon sa gihapon si Gov. Contreras sa iya nga trabaho bilang gobernador kun sa diin ipadala lamang sa iya balay ang tanan nga mga papeles ukon mga dokumento nga pilirmahan.
Nagapati naman si Gov. Contreras nga posible nakuha sini ang virus sa duha sini ka mga empleyado nga una na nagpositibo sa amo nga balatian.
Ginpanginwala naman sang gobernador ang nagalapta nga isyu nga nakuha sini ang virus sa pagsugat sa mga Locally Stranded Individuals ukon LSI’s nga nagapauli sa probinsya.
Kasunod sini, ginmanduan naman ni Gov. Contreras ang Provincial Health Office nga magpatigayon sang hugot nga contact tracing sa mga indibidwal nga nakaupod kag nakasalamuha sini.
Samtang, nagaapelar naman ang gobernador sa mga Capizeño nga ilakip ini sa pangamuyo para sa iya madasig nga recovery batuk sa nasambitan nga virus.
