ROXAS CITY – Ginpatpat ni Capiz Governor Esteban Evan “Nonoy” Contreras ang kaundan sang ginpapanaog sini nga Executive Order No. 20-C, Series of 2020 nga nagapatuman sang travel restriction sa probinsya.
Sa interview sang Bombo Radyo Roxas kay Contreras ginpahayag sini nga apisar nga ginpaidalom na sa Modified General Community Quarantine ukon MGCQ ang probinsya kinahanglan sa gihapon ini ipatuman agud malikawan ang local transmission kag paglapta sang Coronavirus Disease ukon COVID19 sa probinsya.
Suno kay Contreras nga kutob sa Hulyo 5 lamang ang ginhatag nga plaso sang gobernador para sa mga Capizeño nga makapauli sa Capiz.
Pag-abot sa Hulyo 6, 2020, ang tanan nga magasulod sa probinsiya, makabig na nga Locally Stranded Individuals (LSI’s) kag kinahanglan nga magpaidalom sa 14 day quarantine.
Samtang, pasugtan lamang nga magsulod sa probinsiya ang mga Authorized Persons Outside Residence ukon APOR kapareho sang mga empleyado sang gobyerno, mga indibidwal nga nagatrabaho sa probinsiya, mga pasyente nga nagapabulong sa probinsiya, mga medical personnel, mga health workers, mga first responders, kag mga emergency personnel, kag mga locally stranded individuals nga ang ila nga pagpauli ang ginpatigayon sang LGU’s.
Kalakip pa sa makasulod sa probinsiya ang mga medical personnel, armored cars, stranded OFWs kag delivery trak nga nagakarga sang essential goods.
Dugang pa sang gobernador nga pahanugotan lamang nga makasulod ang mga delivery vans sang essential goods apang kinahanglan lamang nga mag-agi sa maid-id nga monitoring depende sa lugar nga ginhalinan sini.
Kinahanglan man suno kay Contreras nga magprisentar sang ila valid ID, travel order, certificate of employment, health declaration kag medical certificate nga nagapamatuod nga indi sila infected sang nasambit nga virus.
Ginpahayag naman ni Contreras nga ginakonsiderar man sang provincial government kag Department of Interior and Local Government ukon DILG ang pagpatuman sang travel restrictions sa probinsya.
Magapakig-angut naman ini sa mga Local Chief Executives sa probinsya natuhoy sa pagpatuman sang nasambit nga pagsulundan.
Ang nasambit nga pagsulundan suno sa gobernador ang aprubado man sang Inter Agency Task Force ukon IATF.
Gin-athag naman ni Contreras nga epektibo lamang ang nasambit nga pagsulundan sa sulod sang 15 diyas.
