Gindayaw ni Capiz Governor Fredenil H. “Oto” Castro si Police Brigadier General Randulf T. Tuaño, Regional Director sang Police Regional Office 6, bangud sa iya maayo nga pamatasan bilang opisyal sang kapulisan.
Ini ang ginpahayag ni Castro matapos ang command visit kag awarding sang plaque of recognition nga ginhiwat sa Camp Teodorico C. Apil sa Barangay Lanot, Roxas City, may kaangtanan sa madinalag-on nga pag-implementar sang Project Restrict, Track and Turn-In ukon RTT 3389.
Suno sa Gobernador, nakita niya kay PBGen. Tuaño ang maayo nga pamatasan kag disiplina bilang isa ka police officer.
Dugang pa ni Castro, apisar nga mataas ang ranggo ni Tuaño, nahibaluan sini kon paano ginatuman ang iya responsibilidad bilang opisyal sang PNP kag ang iya papel bilang isa ka ordinaryo nga tawo.
Ginalauman naman sang Gobernador nga mapadayon ni Tuaño ang iya maayo nga karakter kag mangin ehemplo sa iban pa nga mga katapo sang kapulisan sa pagserbisyo kag pagmintinar sang kalinong kag katawhay sa Western Visayas.
