ROXAS CITY – Maga-apelar si Capiz governor Esteban Evan ‘Nonoy’ Contreras sa national Inter-Agency Task Force on Emerging Infectious Diseases (IATF-EID) nga palawigon pa ang ginapatuman nga general community quarantine (GCQ) sa probinsiya.
Sa interview sang Bombo Radyo sa gobernador, ginpahayag sini nga sa pihak nga halos tatlo ka semana na nga wala sang may narekord nga kaso sang coronavirus disease (COVID-19) sa probinsiya, indi dapat magpakampante ilabi na nga may mga kaso pa sang amo nga balatian sa kaiping nga mga kaprobinsiyahanan sa Western Visayas
Suno diri nga luyag niya nga palawigon ang community quarantine tubtob sa katapusan sang Mayo.
Apang ginpahayag ni Contreras nga pananglitan indi magpabor ang national IATF sa iya apelar, magapatuman sa gihapon ini sang mga polisiya kag minimum health protocols agud malikawan ang paglapta sang nasambit nga balatian apisar nga na-classify bilang low-risk area sa COVID-19 ang rehiyon.
Kun paboran naman ang apelar sini, ginpahayag sang gobernador nga nakahanda siya nga amyendahan ang ginpapanaog sini nga Executive Order No. 18.
Ang nasambit nga EO ang nagapatuhoy sa pagsulundan sa pagpauli sa probinsiya sang mga Overseas Filipino Worker (OFW’s) kag locally-stranded repatriates.
Mahibaluan nga mangin ang Western Visayas Regional Task Force (WVRTF) ang luyag man nga ipabilin ang community quarantine sa Region 6.
Sa pihak nga bahin, ginpasalig man sang gobernador nga solusyunan sini ang reklamo natuhoy sa atrasado nga sweldo sang mga frontliners nga naga-duty sa COVID-19 facility sang probinsiya nga amo ang Roxas Memorial Provincial Hospital.
