Nagpakig-angot ang Capiz provincial government sa Department of Agriculture-Western Visayas (DA-6) agud makahatag sang bulig sa mga sugarcane farmers nga apektado sang Red-Striped Soft Scale Insect (RSSI) infestation.
Nagpakigkita si Gov. Fredenil Castro kay DA-6 Regional Technical Director Maria Teresa Solis sang Agosto 20 agud talakayon ang posible interventions para sa mga mangunguma nga naapektuhan sang peste.
Suno kay Solis, handa ang DA-6 nga maghatag sang nagakaigo nga agricultural inputs, lakip ang chemicals, pesticides kag biological control agents, nga magamit sa nagkalain-lain nga tion sang produksyon sang tubo agod makontrol ang RSSI kag mapakunhod ang epekto sini sa mga pananom.
Ginpahayag man ni Solis ang posibilidad nga makig-angot sa Department of Social Welfare and Development (DSWD) para sa financial assistance sa mga apektado nga mangunguma kag ila mga pamilya.
Suno kay Castro, nakaumpisa na ang provincial government sang koordinasyon sa DSWD bilang kabahin sang ila tikang sa pagbulig sa mga mangunguma nga apektado sang infestation.
Ang koordinasyon ginhimo agud maprotektahan ang palangabuhian sang mga mangunguma sa Capiz kag ma-preserve ang agricultural resources sang probinsya.
Ginpabutyag ni Castro nga nagapabilin nga determinado ang provincial government sa paghatag sang suporta kag pagpatuman sang mga tikang agod masolusyunan ang RSSI outbreak kag masuportahan ang padayon nga produksyon sa agrikultura sang Capiz.
