ROXAS CITY – Natalana nga magbakal sang masobra isa ka libo ka mga polymerase chain reaction (PCR) test kits ang probinsiya sang Capiz nga gamiton para sa mga magapauli sa probinsiya nga ginadudahan nga nalatnan sang coronavirus disease (COVID-19).
Mahibaluan nga ginpainan sang 1.8 milyones pesos nga pondo ang pagbakal sang kapin sa 1, 100 ka mga PCR test kits.
Suno kay Provincial Health Officer Dr. Leah Del Rosario, kulang pa ang nasambit nga mga test kits bangud sandig sa guidelines sang Department of Health, mas maayo kun mas madamo ang mapaidalom sa tests.
Bangud diri, nag-suhestiyon ang mga miyembro sang Sangguniang Panlalawigan nga kun mahimo 3, 000 tubtob 5, 000 ukon masobra pa ang baklon nga mga testing kits.
Apang ginpahayag ni Del Rosario nga may 8 naman ka mga local government units (LGU’s) ang magabakal man sang nasambit nga testing kits.
Angut diri, pagahinalaan sang provincial board sa ila committee hearing kun pila ang igapain nga pondo sang probinsiya para sa pagbakal sang nasambit nga mga testing kits.
