ROXAS CITY-Ginpakaamayo sang provincial government nga himuon bilang quarantine facility ang Capiz Gymnasium sa Villareal Stadium para sa mga asymptomatic patient nga nagpositibo sa COVID-19.
Ini ang ginkompirmar ni Dr. Ramon Alex Nolasco, head sang Hospital Management and Services sang mainterview sang Bombo Radyo.
Kasunod ini sang pagpamalibad sang Archdiocese of Capiz nga himuon nga quarantine facility ang Cagay Seminary.
Ginpahayag ni Nolasco nga may yara sang mga modular tent nga igapahamtang sa sulod sang gym nga mahimo istaran sang mga pasyente.
Dugang pa sini nga may yara man sang higdaan, lamesa, electric fan kag hygiene kit sa sulod sang tent para sa mga pasyente.
Magluwas diri, may yara pa sang igapahamtang nga television sets kag mga board games sa amo nga quarantine area.
Ginpasiguro naman ni Nolasco nga hugot ang ila pagbantay sa mga asymptomatic patients agud sila makaguwa sa amo nga facilidad.
Samtang, plano naman nga gamiton bilang quarantine facility para sa mga frontliners ang CPC Calipayan Campus nga gintanyag sang Archdiocese of Capiz.
Mahibaluan nga sarang maka-akomodar sang masobra 60 ka mga asymptomatic patients ang nasambit nga quarantine area.
