ROXAS CITY – Pagahulaton sang gobyerno-probinsiyal sang Capiz ang mangin rekomendasyon sang coronavirus disease (COVID-19) National Task Force sa Abril 30 kun iga-retain, i-dowgrade ukon i-upgrade ang ginapatuman nga community quarantine sa probinsiya.
Ini ang nahinalaan sa ginpatigayon nga sinapol sang COVID-19 Capiz Provincial Inter-Agency Task Force.
Sa nasambit nga sinapol nahinalaan nga hulaton sang gobyerno-probinsiyal kun ano ang mangin rekomendasyon sang national task force kun palawigon pa ang ginapatuman nga Enhanced Community Quarantine (ECQ) sa probinsiya tubtob sa Mayo 15 ukon i-downgrade ini sa General Community Quarantine (GCQ).
Suno kay Capiz Governor Esteban Evan ‘Nonoy’ Contreras magasumiter man sang rekomendasyon ang gobyerno-probinsiyal sang Capiz sa national task force base sa mangin assessment sini kalakip ang gina-rekomendar man sang tagsa ka mga local government units (LGU’s) sa mga kabanwahanan.
Mahibaluan padayon sa karon nga yara sa idalom sang (ECQ) ang bilog nga probinsiya bangud sang COVID-19 pandemic kag magalawig ini tubtob sa Abril 30.
