ROXAS CITY – Igapaidalom na sa enhanced community quarantine ang bilog nga probinsiya sang Capiz.
Ini ang ginpahayag mismo ni Capiz Governor Esteban Evan ‘Nonoy’ Contreras sa ginpatigayon nga press-conference sang gobyerno-probinsiyal natuhoy sa coronavirus disease (COVID-19).
Kasunod ini sang pagkapagkit sang labing una nga kaso sang nasambit nga balatian sa probinsiya.
Suno sa gobernador nga ang pagpaidalom sa enhanced community quarantine sa bilog nga probinsiya ang sandig sa iya ginpapaog nga Executive Order No. 12, series of 2020.
Ginpahayag sang gobernador nga nasaad sa amo nga EO ang mas hugot pa nga mga pagsulundan agud mapunggan ang paglapta sang amo nga balatian sa probinsiya.
Epektibo ang nasambit nga pagsulundan, alas 12 sang kaagahon sang Marso 25, 2020.
Ginpatpat naman ni Atty. Atlas Catalan, Public Information Officer sang gobyerno-probinsiyal ang pila ka mga importante nga probisyon sa amo nga Executive Order.
Kasunod sa pagpaidalom sa enhanced community quarantine sa probinsiya, isa ka miyembro na lamang sang pamilya ang mahimo nga makaguwa sa ila balay nga amo ang pagahatagan sang home quarantine pass sang ila nga barangay.
Ini sila suno sa opisyal ang dapat nga i-designar sang isa ka pamilya para magbakal sang ila mga kinahanglanon kalakip na ang pagkaon, tubig, bulong kag iban pa.
Nagakadapat nga ang mga barangay officials amo ang maga-proseso sang home quarantine pass kag paga-aprubahan sang ila nga local chief executive.
Mahimo man mahatagan sang quarantine pass ang mga nagatrabaho sa pribado man ukon sa sektor sang gobyerno.
Pagasaraduhan man ang tanan nga mga pribado nga establisyemento magluwas na lamang sa mga nagabaligya sang basic necessities kalakip diri ang merkado, supermarkets, water refilling stations kag restaurants apang dapat take-out basis lamang.
Mahimo man magbukas ang mga botika, hospital kag dental clinics.
Indi man sakop sa pagpasarado sang pribado nga establisyemento ang mga gasoline stations, media establishments kag BPO companies.
Sandig man sa nasambit nga EO, kanselado ang biyahe sang tanan nga public transports.
Estrikto man nga ipatuman ang curfew sa bug-os nga probinsiya ilabi na ang mga indibidwal nga may dako nga risgo nga malatnan sang nasambit nga balatian kalakip na ang mga kabataan kag katigulangan.
