ROXAS CITY, CAPIZ— Nag-arangkada ang ekonomiya sang Capiz matapos magtala sang 8.7% growth rate sa Gross Domestic Product ukon GDP sang 2025, nga nagbutang sa probinsya sa ikaduha nga pwesto sa mga probinsya sa Pilipinas nga may pinakadaku nga economic growth, suno sa Philippine Statistics Authority ukon PSA.
Base sa pinakabag-o nga datos sang PSA para sa GDP Year-on-Year Growth Rates sang mga probinsya kag highly urbanized cities halin 2024 tubtob 2025, mas mataas ang 8.7% nga pagtubo sang ekonomiya sang Capiz kumpara sa 4.4% nga national GDP growth sa amo man nga panahon.
Ginkilala ang wholesale kag retail trade bilang isa sa mga nagapanguna nga nagasuporta sa pagtubo sang ekonomiya sang probinsya. Suno sa PSA, ini ang may pinakadaku nga kontribusyon sa overall economic growth sang Capiz, nga nagapakita sang padayon nga aktibidad sa sektor sang negosyo kag komersyo.
Importante man ang kontribusyon sang agriculture, forestry and fishing sector, ilabi na ang fisheries kag aquaculture. Base sa datos, nagtaas sang 69.9% ang production value sang aquaculture sa Capiz, halin sa P9.49 bilyon sang 2024 pakadto sa P16.12 bilyon sang 2025.
Nagapadayon man ang pag-uswag sang services sector, nga nagalakip sa trade, transportation, food and accommodation, health, professional services kag iban pa nga serbisyo. Sang 2024, ini ang pinakadaku nga major sector sang ekonomiya sang Capiz kag nagtala sang 6.9% growth rate.
Suno sa mga datos, nagasuporta sa economic activity sang probinsya ang nagkalain-lain nga sektor, lakip ang mga mangunguma, mananagat, negosyante, mga nagatrabaho sa serbisyo kag pribado nga sektor, upod sa mga programa kag inisyatibo sang lokal nga panggobyerno.
Apang para sa mga Capiznon, indi lamang dapat sa mataas nga numero sang GDP masukod ang economic growth. Mas importante nga ang ini nga pagtubo magresulta sa mas madamo nga trabaho, mas malig-on nga pangabuhian, dugang nga oportunidad sa negosyo, kag mas maayo nga kalidad sang kabuhi.
Sa pag-abot sang 8.7% economic growth, nagapakita ang Capiz sang positibo nga direksyon sa ekonomiya nga ang pagtubo sang probinsya mahimo mangin pundasyon para sa mas madamo nga oportunidad kag mas malig-on nga palaabuton sang mga Capiznon.
