ROXAS CITY – Opisyal na nga ginlunsiyar ang Capiz KADIWA ni ANI AT KITA sang gobyerno-probinsiyal sini nga adlaw, Abril 14.
Ini nga programa ang gindihon sang gobyerno-probinsiyal sang Capiz pinaagi sa Office of the Provincial Agriculturist.
Sa opisyal nga paglunsiyar sang nasambit nga programa, ginbuksan ang Capiz KADIWA Market sa Corner Mabini-Bilbao Street, Roxas City.
Diri ginabaligya ang pila ka mga produkto sang mga mangunguma gikan sa banwa sang Dumalag kag Maayon.
Kalakip sa ginabaligya diri amo ang mga utanon kapareho sang mushroom, pechay, ampalaya, kalabasa, sili, okra, dragon fruit kag madamo nga iban pa.
Suno kay Provincial Agriculturist Sylvia Dela Cruz, mas barato ang presyo sang mga ginabaligya sa nasambit nga lugar kun ikomparar sa mga merkado-publiko.
Ginkompirmar man sini nga may mga opisyales naman kag pribado nga grupo nga nagpamakal sa ila sang mga utan bangud ila nga igapanghatag sa mga pumuluyo bilang kabahin sang ila relief operations.
Suno diri nga katuyuan sini nga mabuligan ang mga mangunguma subong man makabaligya sa tawo sa mas barato nga presyo.
Ginpahayag sini nga ang ini nga programa ang gindihon kasuno sang ginapatuman nga Enhanced Community Quarantine (ECQ) bangud sang coronavirus disease (COVID-19) pandemic apang ila pa nga pagapanumduman kun padayunon ini bisan pa matapna na ang nasambit nga balatian.
