ROXAS CITY – Nakighinun-anun na ang katapo sang Capiz Maritime sa pamunuan sang fisherfolks agud hinalaan kag mahatagan sang solusyon ang ginpalab-ot nga reklamo sang mga magagmay nga manugpangisda may kaangatanan sa pagkasamad sang ila arong bangud sa mga manuglikos.
Sa interview sang Bombo Radyo sa hepe sang Capiz Maritime Police Station nga si Police Major Wilmar Bolivar, ginpahayag sini nga sa ginpatigayon nga paghinala ila nakasugtan nga paga-istoryahon ang mga manuglikos kun sa diin ang ila maagyan nga mga arong ang nagakaguba.
Suno kay Bolivar, wala pa nila matumod kun may yara sang mga pangayaw nga nagapatigayon sang illegal nga pagpangisda sa kalalawran nga sakop sang probinsya.
Ginpahayag man sini nga ang nasambit nga reklamo ang ila pagahatagan sang atensyon kaupod ang City Agriculture Office, agud gilayon nga mahatagan sang sabat.
Matandaan nga nagpalab-ot sang sulat ang mga magagmay nga mangingisda sa Capiz nagikan sa Barangay Dumolog, Cogon kag Culasi sa syudad sang Roxas bangud apektado na ang ila pangabuhianan sa operasyon sang likos nga nagasamad sa ila ginapahamtang nga arong sa kadagatan.
Samtang, ginsiling ni Bolivar nga padayon ang ila pagmonitor sa kadagatan kaupod ang Bantay Dagat sang probinsya.
