ROXAS CITY, CAPIZ – Nagapadayon ang kampanya sang Capiz Maritime Police Station kontra sa iligal nga pagpangisda, ilabi na sa mga coastal towns sang probinsya.
Sa interview sang Bombo Radyo kay Police Lieutenant Virgil Cipriano, iya ginpahayag nga sa sulod sang duha ka bulan nga pagtungtong niya bilang hepe sang Capiz Maritime Police, pila na ka operasyon ang ginpatigayon nga nagresulta sa pagkadakop sang mga nagalapas sa mga Municipal Ordinance nga naga-regulate sa paggamit sang dunang manggad sa kadagatan.
Suno kay Lt. Cipriano, apisar sa kakulang sang kagamitan sang Maritime Police, nagapangita sila sang paagi agud padayon nga makapatigayon sang operasyon.
Magluwas sa operasyon kontra sa illegal fishing, aktibo man ang Capiz Maritime Police sa pagbulig sa mga search and rescue operations kaupod ang mga local emergency response teams, Bureau of Fire Protection (BFP), kag Philippine Coast Guard (PCG). Aktibo man ang mga ini sa mga clean-up drive kag disaster response efforts sang mga Local Government Unit.
Nagapanawagan si Lt. Cipriano sa publiko, labi na gid sa mga pumuluyo sa baybayon, nga buligan ang ila ahensya sa pagprotekta sang kadagatan.
Ginahaylo man sini ang mga pumuluyo nga ipahibalo gilayon sa ila talatapan kon may makita sila nga mga iligal nga aktibidad, pareho sang dynamite fishing kag iban pa nga iligal nga pamaagi sang pagpangisda.
