ROXAS CITY – Nagdangat na sa karon sa 27 ang napagkit nga coronavirus disease (COVID-19) cases sa probinsiya sang Capiz.
Sa nasambit nga numero, 18 diri ang active cases, 7 ang naka-recover kag nagapabilin sa 2 ang napatay.
Mahibaluan nga kahapon nga adlaw sang Dominggo, Hulyo 19, narekord ang panibag-o nga apat ka mga kaso nga ginalakipan sang 33-anyos nga lalaki nga residente sang Maayon, Capiz kag gikan sa Quezon City, Metro Manila; 46-anyos nga lalaki nga residente sang Jamindan, Capiz kag gikan sa Quezon City, Metro Manila; 68-anyos nga babaye nga residente sang Tapaz, Capiz kag gikan sa Santa Mesa, City of Manila, Metro Manila; kag 25-anyos nga lalaki nga residente sang Pilar, Capiz kag gikan sa Quezon City, Metro Manila.
Sang nakaligad nga Sabado nga adlaw, Hulyo 18, napagkit man ang tatlo ka mga kaso sang amo nga balatian sa probinsiya nga ginalakipan sang 22-anyos nga lalaki nga taga-Panay kag Locally Stranded Individual (LSI) nga may yara sang travel history sa Muntinlupa City kag Metro Manila; 31-anyos nga lalaki nga may yara sang travel history sa Japan kag Metro Manila nga residente sang siyudad sang Roxas kag 35-anyos nga lalaki nga may yara sang travel history sa Norway kag Metro Manila nga residente sang banwa sang Pontevedra.
Mahibaluan nga padayon ang contact tracing sang tagsa ka mga local government units (LGU’s) ilabi na sa mga indibidwal nga ginpaidalom sa strict-home quarantine kag may mga close kag general contact.
Mahibaluan nga may ginahulat pa nga 739 tanan ka mga pending results ang Capiz Provincial Health Office gikan sa Western Visayas Medical Center (WVMC) sa siyudad sang Iloilo.
Sa nasambit nga numero, 334 diri ang mga LSI’s; 308 ang Returning Overseas Filipinos (ROF’s); 69 ang mga High-Risk Contacts (HRC’s); kag 28 naman ang mga suspected cases.
