ROXAS CITY, CAPIZ – Nakabalhag na sang isa ka kaso sang MPox ang probinsya sang Capiz. Ini ang ginkumpirma sang Capiz Provincial Government pinaagi sa Provincial Health Office.
Matandaan nga sang Hunyo 17, may yara sang pito ka mga suspected cases ang probinsya.
Duha ka laboratory results subong ang ginpaguwa sang Research Institute for Tropical Medicine kag ginpadala sa Department of Health Western Visayas Center for Health Development sa diin isa ang positibo kag isa ang negatibo.
Ang kumpirmado nga kaso ang nagapaidalom sa home isolation kag ginatatap sang Local Health Office.
Amat-amat naman nga naga-ayo ang skin lesion sang pasyente kag ang tanan nga idenfied close contacts ang padayon nga gina-assess kag gina-monitor.
Sa subong, nagapanawagan ang Provincial Government sa tanan nga Capiznons nga magpabilin nga kalmado, cooperative kag vigilant sa pihak sang una nga kaso sang MPox nga nabalhag.
