CAPIZ – Kabug-osan nga 119 bullying incidents ang na-report sa Capiz kag Roxas City sang School Year 2025-2026, sandig sa consolidated division reports sa mga insidente sang bullying sa eskwelahan.
Base sa report, ang Schools Division of Capiz naka-record sang 89 bullying cases, kag tanan sini ang na-solbar. May yara sang duha ka mga kaso nga gin-refer ang division sa government agencies para sa nagakaigo nga intervention, samtang wala naman sang kaso nga nabilin para sa monitoring.
Samtang, ang Schools Division of Roxas City ang naka-record sang 30 bullying cases sa amo man nga school year. Tanan nga reported incidents ang na-solbar man kag wala sang pending cases nga gina-monitor kag wala man sang may nahimo nga referrals sa iban nga ahensya sang gobyerno.
Nagapamatuod ang data nga ang duha ka mga school divisions ang nakalab-ot sang 100 percent resolution rate sa tanan nga reported bullying incidents kadungan sang nasambit nga school year.
Sa Western Visayas, kabug-osan nga 966 bullying cases ang gin-report. Sa amo nga numero, 867 ang na-solbar, samtang 99 cases ang nagapabilin nga gina-monitor.
May yara sang 13 ka mga kaso ang gin-refer naman sa government agencies para sa nagakaigo nga tikang.
Sa mga school divisions sa rehiyon, ang Iloilo City ang naka-record sang pinakamataas nga numero sang bullying incidents nga may 452 cases, ginasundan sang Guimaras nga may 213, Iloilo nga may 96, Capiz may 89, Antique nga may 76, Roxas City nga may 30, Passi City nga may walo kag Aklan nga may duha.
Padayon nga nagapahanumdom ang Department of Education (DepEd) Western Visayas sa mga eskwelahan nga pabaskugon ang anti-bullying programs, engganyuhon ang mga estudyante nga mag-report sang mga insidente, kag siguraduhon nga ang tagsa ka reklamo ang ginahatagan sang igtalupangod agud mapabilin nga safe ang learning environment para sa mga estudyante.
