Naka-record ang Capiz sang pinakamataas nga porsyento sang rural households nga naapektohan sang pagbaha sa Western Visayas sang tuig 2023-2024 sandig sa data sang Philippines Socioeconomic Panel Survey (PSPS) nga ginpatigayon sang Philippine Institute for Development Studies (PIDS).
Ang survey nagapakita sang 8.7 percent nga rural households sa Capiz nga naapektohan sang pagbaha sa sulod sang 12 ka bulan antes ang survey.
Ini ang lapaw pa sa doble nga regional average nga 4.3 percent, rason nga ang probinsya sang Capiz amo ang pinakaapektado sang pagbaha.
Ang baha ang ginatumod bilang ‘second most common natural disaster’ sa Western Visayas, una diri amo ang bagyo.
Sa mga probinsya sa rehiyon, ang Capiz ang may yara sang pinakamataas nga share sang households nga apektado sang pagbaha.
Ginasundan ini sang Antique nga may 7.8 percent, samtang ang Aklan ang naka-record sang 5.3 percent kag Iloilo nga may 2.4 percent.
Ang Negros Occidental naman ang naka-record sang mas manubo sa one percent.
Natukiban man sa survey nga 10.8 percent sang rural households sa Western Visayas ang naka-eksperyensya sang indi magnubo sa isa ka natural disaster.
Ang bagyo amo ang nagapabilin nga ‘most common natural disaster’ sa rehiyon, nga nagaapekto sa 6.8 percent nga mga panimalay.
Ang Antique amo ang may pinakamataas nga numero sang panimalay nga apektado sang bagyo sa 15.1 percent.
Sandig sa pagtuon, madamo sa mga panimalay nga apektado sang natural disasters ang nagapuyo sa mga barangay nga nagabaton sang government disaster assistance.
Nahibaluan nga ang PSPS ang naga-cover sang 15,088 rural households sa 500 barangays sa Aklan, Antique, Capiz, Iloilo, kag Negros Occidental.
Ang nasambit nga survey ang may katuyoan nga makahatag sang data nga makabulig sa mga government agencies nga ma-improve ang disaster response kag community development programs.
