Ginpamatud-an sang Probinsya sang Capiz ang ila kabaskog sa emergency response matapos nila makuha ang ikatlo nga sunod-sunod nga Overall Championship sa Regional Rescuelympics 2026.
Ginhiwat ang awarding ceremony sang Hulyo 28, 2026 sa Binirayan Sports Complex sa San Jose, Antique, nga gintambongan sang mga rescue team halin sa nagkalain-lain nga probinsya sang Western Visayas.
Nangin Guest of Honor and Speaker si Office of Civil Defense Chief of Staff Assistant Secretary Cesar Idio, nga naghatag sang pagdayaw sa tanan nga mga partisipante bangud sang ila dedikasyon sa pagpaayo sang ila ihibalo kag pagpalig-on sang koordinasyon sa pagresponde sa mga emerhensya kag kalamidad sa rehiyon.
Bangud sa ila pagkampeon, nakabaton ang Capiz sang plaque of recognition kag ₱100,000 nga cash prize.
Nangin 1st Runner-up ang Antique nga nakabaton sang ₱70,000 samtang ang Iloilo Province ang 2nd Runner-up nga may ₱50,000 nga premyo.
Ginkilala man ang Aklan kag Guimaras bilang 3rd kag 4th Runners-up, nga kada isa nakabaton sang plaque kag ₱25,000.
Nagdominar man ang Team Capiz sa mga espesyal nga awards matapos maangkon ang Best in Patient Management, Best in Run Time, Best in Uniform, Best in High Angle Rescue, kag Most Disciplined Award.
Ang tagsa ka award may kaangay nga plaque kag ₱20,000 nga cash prize.
Samtang, ang Antique naangkon sang Best in Communications and Coordination Award, nga may plaque kag ₱20,000 nga premyo.
Sa Static Display Competition, nagkampeon ang Aklan kag nakabaton sang plaque kag ₱50,000.
Nangin ikaduha ang Capiz nga may ₱40,000 samtang ikatatlo ang Iloilo nga may ₱30,000.
Ang Antique naman ang runner-up kag nakabaton sang ₱10,000.
Padayon nga ginahimo ang Regional Rescuelympics bilang higayon agud mapalig-on ang kahandaan sang mga rescue team, mapauswag ang ila teknikal nga ihibalo, kag mapabakod ang koordinasyon sa pagresponde sa mga emerhensya kag kalamidad.
Sa pagtakop sang programa, opisyal man nga ginturn-over ang pag-host sang Regional Rescuelympics 2027 sa Probinsya sang Aklan, nga mangin sunod nga host sang nasambit nga kompetisyon.
