ROXAS CITY – Pormal na nga ginbuksan ang Capiz Newborn Screening Continuity Clinic sa Roxas Memorial Provincial Hospital(RMPH) Lanot-OPD, subong nga adlaw, Hunyo 7, 2024.
Ini ang ginpangunahan ni Capiz Governor Fredenil Castro kaupod ang pila ka mga opisyales kag mga doctor.
Sa mensahe ni Gov. Castro, ginsiling sini nga ang nasambit nga pagbukas sang amu nga clinic sa probinsya isa sa iya nangin prayoridad kag plano sini nga mahimo bilang Medical Center ang amu nga ospital.
Mahibaluan nga ang Capiz Newborn Continuity Clinic, libre nga magahatag sang serbisyo partikular sa mga bag-o bun-ag nga lapsag para sa ila mga follow up check ups kag pagbulong sa may mga ginasupreher nga balatian.
Suno naman kay Dr. Florencio Luching, Hepe sang RMPH, dako nga bulig ang Newborn Continuity Clinic bangud may mga sintomas nga indi gilayon nga makit-an sa mga lapsag, gani samtang temprano pa suno sa iya mahatagan na ini sang pagtamud kag gilayon nga mabulong.
