Pasado sa gina-require nga rekisitos sang Department of Health ukon DOH ang Capiz National High School agud himuon nga quarantine facility sang mga na-stranded nga mga seafarers sa Cebu City kag Metro Manila nga natalana nga magpauli sa probinsiya sang Capiz.
Ini ang ginkompirmar ni Mrs. Rita Villareal, principal sang nasambit nga buluthuan sang mainterview sang Bombo Radyo.
Suno kay Villareal nga nakapatigayon na sang ocular inspection sa nasambit nga eskwelahan ang Provincial Health Office kaupod si Capiz Governor Esteban Evan ‘Nonoy’ Contreras agud tsekyaron ang mga pasilidad nga maggamit sang mga magatenir diri nga seafarers.
Ginpahayag ni Villareal nga 120 ka mga hulot ang sarang maggamit nga quarantine facility sang nasambit nga seafarers kun sa diin may bastante diri nga suplay sang tubig kag iban pa.
Ginaplanuhan sang PHO nga sa Gabaldon Building igapahamtang ang mga seafarers apang ginakabalak-an ang mahina nga suplay sang tubig diri.
Apang suno kay Villareal nga firetruck ang magasuplay sang tubig nga gamiton sang mga seafarers nga magaistar sa nasambit nga buluthuan pananglitan maghina ang suplay sang tubig
Samtang wala man suno diri sang pagpamatuk sa nasambit nga plano ang mga ginikanan kag mga manunudlo sang nasambit nga buluthuan.
