Hugot nga gin-athag sang Capiz Parents-Teachers Association-Federation ang implementasyon sang “No Collection Policy” sa tanan nga eskwelahan sa probinsya sang Capiz.
Sa interview sang Bombo Radyo kay Mr. Jover Bereber, presidente sang Parents-Teachers Association Federation, iya ginpahayag nga importante gid nga sundon ang nasambit nga polisiya agod malikawan ang bisan ano nga uri sang iligal ukon wala sing pahamtang nga paningil sa mga ginikanan.
Suno sa iya, ang “No Collection Policy” nagahatag proteksyon sa mga pamilya, ilabi na gid sa mga ginikanan nga ara sa laylayan, agod indi mabug-atan sang dugang nga galastusan may kaangtanan sa edukasyon sang ila kabataan.’
Pahayag pa niya nga dapat klaro ang mga limitasyon sang PTA voluntary contributions kag kinahanglan ini nga may husto nga koordinasyon sa mga school officials.
Nagpanawagan ang natungdan sa mga eskwelahan kag lokal nga panguluhan nga suportahan ang polisiya kag palig-onon ang information drive agod ang tanan nga ginikanan mahibaluan ang ila mga katungdanan kag pribilehiyo sa sulod sang eskwelahan.
