ROXAS CITY – Ginpalab-ot sang katapo sang Capiz Provincial Health Office (PHO) sa publiko ang importansya sa pagselebrar sang World Mental Health Month subong nga Oktobre.
Sa interview sang Bombo Radyo kay Mr. Ayr Altavas P.I.O sang Capiz PHO kag Ms. Jasmin Gallaza Mental Health Program Manager, ginpahayag sang mga ini nga importante nga hatagan sang nakaigo nga pagtamud ang kaangay sini nga programa ilabi na ang mga indibidwal nga nagakinhanglan.
Tinutuyo sang amu nga programa agud pabugtawon ang kada isa kun anu ang importansya nga makaangkon sang isa ka maayo nga paminsaron.
Apang, anu bala ang Mental Health?
Kalakip diri amu ang emotional, psychological kag social well-being ukon pagiging maayo sa kada isa.
Nagabulig ini kung paano natun atubangon ang stress ukon mga pagtilaw sa kabuhi kag paano makibagay sa iban nga indibidwal.
Suno kay Gallaza, pila sa mga kategorya nga estado sang Mental Health amu ang healthy, reacting, injured kag ill.
Ang isa ka healthy kag mapagros nga estado sang mental health, nakabatayag sila suno diri sang normal kag may maayo nga enerhiya, ginahatagan sang mga ini sang importansya ang ila mga support systems.
Ang mga tawo naman nga reacting kag madali nga maakig ang nakabatyag sang pagkairita kag kasubo, nabudlayan man sila suno diri nga makatulog kag manubo ang ila enerhiya.
Ang mga injured naman nakabatyag sang anxiety, kaakig, kasubo kag nadulaan sang paglaum sa kabuhi kag ang katapusan ang mga indibidwal nga ill may yara sang tuman nga emosyon kag depression.
Gintuad man ni Gallaza ang pila ka mga rason sang mental health problems kalakip na diri ang Trauma ukon abuse, Family history sang mental health problems kag madamo pa
Pananglitan suno diri nga makabatayag sang mental health problems, mahimo nga maapektuhan ang imu kabuhi.
Gani, indi magkahadlok nga magdangop sa mga eksperto kag may ihibalo nga sarang makabulig sa imu bangud importante nga samtang temprano pa lamang, masolusyunan ang ginapangatubang sang isa ka indibidwal ilabi na pag-abot sa mental health.
