ROXAS CITY – Gilayon nga nagpatigayon sang contact-tracing ang Provincial Health Office sa mga nakasugata sang dugang nga duha ka mga persona nga nagpositibo sa coronavirus disease (COVID-19) sa Capiz.
Ini ang ginpahayag ni Provincial Health Office Dr. Leah Del Rosario sa ginpatigayon nga press conference sang gobyerno-probinsiyal.
Mahibaluan nga kalakip sa napagkit nga bag-o nga mga kaso sang COVID-19 sa probinsiya amo ang 53 anyos nga lalaki nga may travel history sa Metro Manila kag yara na karon sa estable nga kondisyon.
Nagpositibo man sa amo nga balatian ang 60 anyos nga babaye nga may travel history sa Dubai kag napatay na sadtong Marso 28, 2020.
Magluwas diri, may isa ka pasyente nga tumandok sang Aklan kag naga-trabaho sa Capiz ang nagpositibo man sa amo nga balatian.
Suno kay Del Rosario nga kasunod sang pag-positibo sang nasambit nga mga pasyente, gilayon nila nga gin-usisa ang mga indibidwal nga posible nakasugata sang amo nga mga persona.
Nagpaathag man ang opisyal sa rason sang wala nila pagpalayag sa publiko sang address sang mga COVID-19 positive patients.
Ginpahayag sini nga kinahanglan nila amligan ang ‘privacy’ sang amo nga mga indibidwal kag matapna ang posible matuga sini nga pag-panic sang publiko.
Apang ginpasiguro sini nga ginahimo nila ang tanan sa ila contact-tracing kag mapasunod sa nagakaigo nga quarantine procedure ang mga indibidwal nga nakasugata sang nasambit nga mga persona.
