Nagpaandam ang Capiz Provincial Health Office (PHO) sa posible nga epekto sang sobra ka init sang adlaw kasunod man sang mataas nga heat index nga naeksperyensyahan sa pila ka lugar sa Western Visayas.
Sa interview sang Bombo Radyo kay Dr. Ramon Alex Nolasco, Head sang Provincial Healh Office, iya ginpahayag nga ang sobra ka paagbulad derikta sa init sang adlaw mahimo magadala sang mga heat-related illness, kaangay sang:
Heat Cramps – nga amo ang pikasal nga aktibidad bangud sa direktang exposure sa init.
Heat Exhaustion – nga amo ang kakulang sang tubig sa lawas.
Heat Syncope – nga amo ang paglipong tungod sa sobra ka init.
Suno kay Nolasco, malikawan ang amo nga mga sakit pinaagi sa pag-inum sang walo ka baso sang tubig o mas sobra pa kada adlaw.
Dugang pa sini nga nagakadapat nga magsuksok sang mga light-colored kag loose nga panapton, regular nga paggamit sang sunblock, labi na kon magligo sa dagat, kag paglikaw sa tuman nga exposure sa init sang adlaw.
Base sa datos, ang heat index sa Roxas City yara sa 36°C, sa Mambusao, Capiz yara sa 36°C samtang sa Dumangas, Iloilo, naglab-ot sa 40°C.
