Nagpagwa sang health advisory ang Capiz Provincial Health Office (PHO) agud paandaman ang mga Capiznon sa posible nga epekto sang haze kag air pollution sa ikaayong lawas.
Ini kasunod sang aso nga ginadala sang hangin halin sa forest fires sa Kalimantan, Indonesia.
Sa interview sang Bombo Radyo kay Dr. Ramon Alex Nolasco, Provincial Health Officer II sang Capiz PHO, iya ginpahayag nga haze isa ka layer sang aso, abo kag iban pa nga magagmay nga particles nga nagalutaw sa hangin.
Suno kay Nolasco, ang pagginhawa sang polluted air mahimo maka-irita sa mata, ilong, tutunlan kag baga, kag mahimo man magpalala sang asthma kag iban pa nga kondisyon sa tagipusuon kag baga.
Bangud sini, ginpanugyanan ang publiko nga magsuksok sang N95 nga sahi sang facemask kun magguwa agud protektahan ang himata kag pamilya batok sa amo nga haze.
Nagpanawagan man ang natungdan sa tanan nga Capiznon nga magpabilin nga kalmado, mahinalungon para sa ikaayong lawas kag kaayuhan sang tanan.
