ROXAS CITY – Wala pa sang reklamo nga nabaton ang talatapan sang Capiz Provincial Internal Affairs Service (PIAS) batuk sa mag-asawa nga pulis, nga ginaalegar nagpangkastigo sa 16-anyos nga lalaki, diri sa syudad sang Roxas.
Sa pagpadulong sang Bombo Patrol team sa opisina sang Capiz PIAS sa Capiz Police Provincial Office, ginkumpirmar diri nga wala pa makapadulong ang luyag magreklamo batuk sa mag-asawa.
Ginapahayag nga kinahanglan makabaton sila sang formal complaint agud masuguran ang imbestigasyon.
Matandaan nga ginareklamo sang isa ka Iloy ang indi pa mahingadlan nga mag-asawa nga pulis bangud sa ginaalegar pagpangkastigo sa iya 16-anyos nga bata nga lalaki.
Nahibaluan nga sa bahin sang mag-asawa nga pulis, ginatudlo nila nga suspek ang 16-anyos nga lalaki sa pagpangmolestiya sa ila bata nga 7-katuig nga lalaki, matapos nga nagsugid ang bata sang ginhimo sang solterito.
Apang, sa baylo nga ipatawag sa police station ang suspek, ginpahayag sang solterito nga ginpakadto ini sang mag-asawa sa ila balay kag ginaalegar nga ginsakit tubtob mag-aku sa natabo.
Matandaan nga nagguwa sa medical examination sang 16-anyos nga lalaki nga may patimaan sang ‘physical injury’ sa iya lawas.
Sa karon, plano sang Iloy nga pormal nga i-reklamo ang mag-asawa nga pulis sa Capiz PIAS agud apisar nga pasakaan sila sang kaso sa ginaalegar pagpangmolestiya, luyag man nila maangkon ang hustisya sa ginaalegar pagpangkastigo sang mag-asawa nga katapo sang PNP.
