ROXAS CITY –Ginahangakat sa karun sang Provincial Director sang Capiz Police Provincial Office ukon (CPPO) ang mga local government units (LGU’s) nga pamatud-an nga may yara sang ginapalusot nga mga indibidwal ang mga kapulisan nga nagabantay sa border checkpoints sang probinsiya.
Kasunod ini sang gina-alegar 6 ka mga residente sang banwa sang Sigma nga nakalusot sa border checkpoint sang Barangay Aglalana, Dumarao.
Ginpanindugan ni Police Colonel Julio Gustilo Jr. nga wala ginapasugtan sang mga kapulisan nga nagabantay sa border checkpoint nga magsulod ang mga Capizeño nga nagikan sa kaiping nga mga kaprobinsiyahan.
Ginpanindugan man ni Gustilo nga ang mga nakalusot sa checkpoint ang nagalaktud kag wala naga-agi sa border.
Ginpahayag man ni Gustilo nga indi nagakadapat nga ibasol lamang sa mga kapulisan kun may yara sang mga indibidwal nga makalusot sa border checkpoint.
Suno pa sa opisyal nga mahimo imbestigaran man sang mga (LGU’s) ang mga nakalusot sa border kag mahimo pabalikon sa ginhalinan nga probinsiya.
Samtang ginpasalig ni Gustilo nga mahimo pasakaan sang panumbugon ang mga kapulisan nga mapamatud-an nga nagpasugot nga makalusot ang pila ka mga indibidwal sa border checkpoint.
