ROXAS CITY – May pila ka mga rekomendasyon ang pamunuan sang Capiz Police Provincial Office sa gobyerno-probinsiyal sa nagahilapit nga pag-downgrade sa General Community Quarantine sang ginapatuman nga Enhanced Community Quarantine sa probinsiya bangud sang coronavirus disease (COVID-19) pandemic.
Ini ang ginpahayag ni Capiz Police Provincial Office Director Police Colonel Julio Gustilo Jr. sang mainterview sang Bombo Radyo.
Suno kay Gustilo nga sa pagtakop sang ECQ sa Abril 30 kag pagsugod sang GCQ sa Mayo 1, iga-rekomendar sini ang pagpabilin sa gihapon sang curfew hour apang ini ang iga-adjust humalin alas 9 sa gab-i tubtob alas 4 sa aga agud mahatagan sang ligwa ang mga negosyante nga makaplastar sang ila baligya sa mga merkado-publiko.
Ginkompirmar sini nga indi man 100 porsyento nga magabalik ang public transport bangud may mangin pagsulundan nga pagahimuon natuhoy sa mangin schedule kag sistema sang pagbiyahe subong man iga-obserbar gihapon sang mga pasahero ang social distancing policy.
Pagadumilian man sa gihapon ang pag-inom sa mga pampubliko nga lugar kag pagalimitahan ang baligyaanay sang mga makahulubog nga ilimnon.
Ginpahayag pa sang opisyal nga magapabilin sa gihapon ang hugot nga border quarantine checkpoints sa mga boundary kag entry points sa probinsiya.
Talalupangdon naman ang pagnubo sang kaso sang mga narekord nga krimen sa probinsiya bangud sang (ECQ).
Suno sa opisyal, bangud sang ECQ kag ginapatuman nga curfew hour, naghagan-hagan ang napagkit nga mga krimen sa probinsiya.
Suno diri nga nagnubo sang 11 tubtob 19 porsyento ang narekord nga mga krimen sa probinsiya sini nga bulan sang Abril kun ikomparar sang bulan sang Marso nga nakapagkit sang 162 ka mga insidente.
Nagnubo man sang 66 ka mga insidente ang narekord humalin Abril 1 tubtob 15 kun ikomparar sa pareho nga period sang nakaligad nga bulan sang Marso.
Magluwas sa ginapatuman nga ECQ kag curfew hour, dako man suno diri ang nabulig sang liquor ban agud mapahagan-hagan ang mga narekord nga krimen sa probinsiya.
