ROXAS CITY – Preparado na ang mga kapulisan sa bilog nga probinsiya sang Capiz para sa pagpatuman sang hugot nga seguridad sa nagahilapit nga All Soul’s Day kag All Saint’s Day.
Ini ang ginpahayag ni Police Col. Canilo Fuentes, pinuno sang Capiz Police Provincial Office sang mainterview sang Bombo Radyo.
Suno kay Fuentes nga duha ka adlaw antes ang Pista Minatay, igabatak ang full-alert status para sa Oplan Undas 2019 agud masiguro ang seguridad kag mangin matalunsay ang selebrasyon sang Pista Minatay.
Suno diri nga hugot nga ginmanduan ang mga chiefs of police sa magkatuhay nga mga kabanwahanan nga magdihon sang ila tagsa-tagsa ka mga programa kag tikang agud magpatuman sang seguridad.
May mga iga-deploy man nga mga kapulisan sa mga terminals, pantalan, kag dalagkuan nga mga malls.
May ipahamtang man nga mga kapulisan sa magkatuhay nga mga patyo sa probinsiya kag mga simbahan.
May yara man sang mga police assistance desks nga mahimo pamangkutan sang mga tawo kun may yara sila sang palamangkutanon.
Suno pa kay Fuentes nga may naka-standby man nga mga first-aiders nga nakahanda magdapat sang nagakaigo nga paglubong kun may magluntad nga anuman nga insidente.
May mga katapo man sang Highway Patrol Group kag Land Transportation Office (LTO) sa magkatuhay nga dalanon nga mahimo mapamangkutan sang mga motorista.
Mangin kabulig man sang mga kapulisan ang mga katapu sang Barangay Peacekeeping Action Team (BPAT) kag mga barangay tanod sa pagpasiguro sang kalinong kag katawhay sa nagahilapit nga Pista Minatay.
