ROXAS CITY – Wala nagauntat ang mga kapulisan sa probinsiya sang Capiz sa ila nga kampanya kontra ilegal nga droga sa pihak sang ginapatuman nga Enhanced Community Quarantine (ECQ) bangud sang coronavirus disease (COVID-19) pandemic.
Ini ang ginpahayag sang tagpamaba sang Capiz Police Provincial Office nga si Police Executive Master Sergeant Donna Asmod sang mainterview sang Bombo Radyo.
Suno kay Asmod nga humalin sang ginpatuman ang ECQ sa probinsiya, nagdangat na sa 18 ka mga drug suspek ang nagkaladakpan sa separado nga mga operasyon sang mga kapulisan.
Ginpahayag sini nga sa nasambit nga numero, 13 sa mga ini ang nagkaladakpan sa anti-drug operations sang Roxas City Police Station sa pagpamuno ni Police Lt. Col. Ricardo Jomuad, Jr.
Tatlo ka mga drug suspek naman ang nadakpan sa operasyon sang Provincial Drug Enforcement Unit sang Capiz PPO kag duha ka mga drug suspek ang nagkaladakpan sa banwa sang President Roxas.
Nagalab-ot suno diri sa 5.44 grams sang ginapatihan shabu ang nakompiskar sa mga operasyon kag napaidalom sa laboratory analysis wala pa diri malakip ang mga narekober sa operasyon sang nagliligad nga mga inadlaw.
Ginkompirmar man ni Asmod nga lunsay ginpasakaan na sang kaso nga paglapas sa Republic Act 9165 ukon Comprehensive Dangerous Drugs Act of 2002 ang nagkaladakpan nga mga drug suspek.
